Konfirmohet se në trupin e 18-vjeçarit nuk ka pasur shenja dhune dhe as shenja helmimi, mostrat e gjakut janë çuar për analiza në Institutin e Mjekësisë Ligjore në Tiranë.
Vdekja e 18-vjeçarit me probleme të shëndetit mendor paraprakisht konfirmohet se ka qenë vdekje natyrale.
Në këtë konkluzion ka dalë grupi hetimor, pas kryerjes së të gjitha veprimeve në vendngjarje, pas kqyrjes së kufomës dhe pas pyetjes së edukatoreve të turnit.
Pak minuta më parë, në Morgun e Spitalit Rajonal Berat, ka përfunduar kryerja e autopsisë mjeko-ligjore, nga e cila është konfirmuar se në trupin e 18-vjeçarit nuk ka pasur shenja dhune dhe as shenja helmimi.
Burime nga grupi hetimor bëjnë me dije se po kryen të gjitha veprimet për sqarimin e plotë të rrethanave të ngjarjes.
Të njëjtat burime konfirmojnë se, pasi janë pyetur edukatoret e turnit që kanë dhënë shpjegimet në lidhje me ngjarjen, janë sekuestruar kamerat e sigurisë së qendrës si dhe është marrë kartela mjekësore nga Spitali Rajonal Berat, ku viktima ishte shtruar disa ditë më parë pasi kishte pasur shqetësime.
Trupi i pajetë i 18-vjeçarit nga Kavaja do tu dorëzohet familjarëve,që janë njoftuar nga policia menjëherë pas ngjarjes. Ngjarja e rëndë ndodhi mesditën e sotme në Qendrën Rezidenciale të Zhvillimit Rajon Berat.
Ka qënë personeli i kësaj qendre që ka gjetur pa shenja jete shtetasin S.Ll,18-vjeç,banues në Kavajë, i cili vuante nga probleme të shëndetit mendor.
Ky shtetas, është pranuar për trajtim pranë kësaj qendre në muajin Qershor 2023,me vendim të Komisionit Qëndror për Vlerësimin e Nevojave të Personave me Aftësi të Kufizuara Tiranë, duke qenë se vuante nga probleme të shëndetit mendor.
